熱浪來襲，放假去海灘就變咗郊遊嘅第一選擇。今日我地就想同大家去隱世靚沙灘白腊灣，輕鬆遠足之後去涼浸浸嘅玻璃水入面暢泳，勁Chill啊！

我地由西貢出發，搭94號巴士係上窰落車，向車頭方向行至麥理浩徑起點，沿西貢萬宜路一路行，途中經過糧船灣、白腊村，係白腊村向下走就會見到沙灘。

白腊灣水清沙幼，5-7月仲係勁清嘅玻璃水，雖然入黎係麻煩啲，但假日都唔少人慕名黎玩水。呢度有士多，亦都有沖身設施(需付費10元)，自己唔洗帶好多野入黎都可以玩返一日。

其實大家如果唔想行，可以搭的士同司機講去白腊灣，落車行15分鐘左右就到。回程都可以係士多Call的士返。

難易度：★★

全程都係平地為主，沿途非常輕鬆。

打卡度：★★★★

白腊灣水清沙幼，游玻璃水好去處，沿路睇海景。

設施完善度：★★★

有洗手間，有士多，亦有付費沖身。

注意呢條路線行入去嘅路上有好多毛毛蟲，大家要睇路啦！另外，白腊行前少少就東壩，大家玩完水有興趣都可以去打個卡。香港真係好多好靚嘅郊野地方，大家去放鬆之餘記住要好好保護佢地，唔好亂拋垃圾啊！仲有記住做足防蚊同防曬措施、要適時保充水份，咁先玩得盡興。今次郊遊習作係咁多，我地下次見啦，byebye！